احنا مين؟
يا شباب
يا بنات
إحنا مبسوطين إنكم معانا هنا وكويس إنكم وصلتم للصفحة ديه أصلها بتحكي عننا ونحب إنكم تتعرفو علينا زي المثل اللي بيقول روب قوم ذهبو إلى قوم قعدو معاهم وإتعرفو عليهم.
المطرقع
ده إسم الشهرة والإسم الأول وكمان اللقب..والطرقعة ديه مش معناها الجنان لاسمح الله ولا الهبل معاذالله ولا العبط لا قدر الله لأ الطرقعة ديه معناها كبير كبير ..يعني أنا بتاع الأفكار والتكتيك والفتافيت وأحيانا القراقيش والكتاكيت..سبع صنايع والبخت ضايع..إهتماماتي منحصرة في الأكل شوفوا مفيش مطعم ولا عربية فول في بلدك إلا ودخلتها بس المشكلة إني مش دايما بخرج…إيه ده إنتوا عايزين تعرفوا كل حاجه بسرعه..مش هينفع..تطرقعوا مني..
الأوشاعنجي
مسؤل الفبركة والذي منه، بحب أفتي في كل حاجة، لو سألتوني ليه! مش هعرف أجاوب أصل ديه موهبة من عند ربنا مليش يد فيها..المهم أحب أقول إنكم نورتونا عالآخر لدرجة إن فاتورة الكهربا جت غالية قوي الشهر ده من نوركم الزيادة….
مخمخ
بحب أمخمخ وأفتكس حاجات جديدة أنا بقى مسؤل الدفلوبمنت يعني بتاع آي تي قد الدنيا مفيش تنتوفة في الموقع إلا وعدلت فيها عشان يطلع بشكل كويس يليق بالناس الحلوة اللي زيكم، على فكرة لو فيه مشكلة قابلتكم قلولي قبل ما حد ياخد خبر بيها….
الرايق
أنا بقى الرسام اللي هنا، شغلتي أفن وأطلع رسومات تعبر عن اللي مكتوب عشان الناس تفهم أكتر، مبحبش الكلام الكتير الرسم بالنسبالي أبلغ تعبير وللا إيه؟
الفكيك
كل حاجة بالنسبالي ماشية بالفكاكة ، فايق قوي وأعجبك يعني… المهم التركيز عليه عامل كبير قوي، مش مهم أنا بعمل إيه هنا ديه أسرار عليا مش أي حد ممكن يعرفها…
ولسة في ناس هتنضم لينا بس السكة واقفة والدنيا زحمة لما ييجو هيعرفوكو على نفسهم
