أسبوع
المفاجأت في دوري المحابيط
كفر ابودوم ينهزم علي ارضه والهيئة يتعادل وأول فوز في تاريخ العتاولة. التقرير: شهد الاسبوع 129 في دوري المحابيط والذي يقام في 3 سنين حوالي 786
لقاء كروي في غيطان وساحات وخرابات المحروسة وشهد الكثير من المفاجأت اهمها
انهزام فريق كفر ابو دوم الذي يتصدر قائمه وجه بحري أمام فريق ابو سوس المغمور
وذلك بـ 5 أهداف مقابل هدف واحد وذلك بغيط كفر أبو دوم ووسط جماهيره اللي سابت
حرق قش الرز وجت تتفرج علي الماتش وقد تقدم في الدقيقه الأولى كفر أبو دوم بهدف
للعابه الفذ حماده فزلكه ولكن في الدقيقه 10 استطاع لاعب أبو سوس رامي زقلط
إحراز 5 اهداف في 5 دقائق في معجزة كروية مش هتحصل تاني، ولكن في الدقيقه 20
ألغي الحكم المباراة بعد أن إندفع جماهير كفر أبو دوم في الغيط وفي الدقيقه 25
تم نقل المصابين إلي الوحدة الصحية وفي الدقيقة 40 صلى اللي نجوا على الحكم..
أما إستاد هيئة البوتاجاز فشهد تعادل فريقه أمام منافسه الشرس هيئة كسح المجاري
والغريب أن المباره استمرت 80 دقيقة كاملة. أما فريق العتاوله فحقق أول فوز له
منذ صعوده من دوري المفاجيع لدوري المحابيط منذ 18 سنه في مباراة مأساوية دموية.
زكي جبر الخواطر يقبل عرض الإحتراف في الوليات المستهبلة
قبل زكي جبر الخواطر العرض المغري الذي قدمه له أحد السماسرة المهتمين باللعيبة
السناكيح راغبي الثراء السريع والذي يتضمن عقد إحتراف لمدة عشرين سنة والإقامة
والجنسية في الوليات المستهبلة وقد علل زكي قبوله للعرض بأنه محتاج يتجوز ويجيب
شقة وعربية آخر موديل
إفتتاح مبهر للدورة الثالثة عشر لأولومبيات دول حوض الغسيل الأكبر
تم إفتتاح بطولة أولومبيات دول حوض الغسيل الأكبر الثالثة عشر والتي تضم أربعين
دولة من دول حوض الغسيل الأكبر وستقوم المسابقات الخاصة بكل بلد في البلد
المنافس وستتكون لجنة الحكام من عشرين عضو يتم إختيارهم حسب الحالة النفسية لكل
حكم وسيكون أسوأهم حال أولهم في القائمة حتى يضمن منظمو الدورة أقصى
تنكيد على المتسابقين
إنتخابات نادي الفامولية تصل لأوجها
ساحة إنتخابات نادي الفامولية العريق لم تخلو من المهاترات والشتائم القبيحة
بين المرشحين لدرجة قيام أحد المرشحين بالردح لأحد منافسيه بالملاية والزنوبة
وإضطر أعضاء النادي لجذب المرشح من قفاه وإدخاله أحد المكاتب بالنادي لتهدئة
الموقف وعلى صعيد آخر إتهم أحد أعضاء النادي العاملين بالأمن لغفلتهم وعدم
إنتباههم لما يحدث بالنادي من أفعال فاحشة وصرمحة وقلة أدب من بعض شباب النادي
سرقة
الملابس الداخلية بنادي الزمبلكية
ما يحدث في غرف تغيير ملابس اللاعبين هو فعلا أمر عجيب و محير، تعددت الشكاوى
من كثرة سرقة الملابس الداخلية الخاصة باللاعبين من غرفة تغيير الملابس الخاصة
بهم وحتى الآن لم يعثر على السارق هل هو واحد من اللاعبين الغلابة في الفريق
الأول أم هو الفراش أم بائع البانجو بالغرفة....لا أحد يعلم
المهاجم
مايكل حميدو سمعه تقيل مشاركة من فيحان خسر فريق كره القدم الطنطاوي جهود مهاجمه الانجليزي
المحترف مايكل حميدو بسبب ضعف سمعه الشديد بسبب ارتفاع الموسيقى فى الديسكو تك
الذى يواظب عليه يوميا و يقول ان احسن تمرين للاعب كرة القدم هو الرقص. عشان
يعرف يرقص اي لعيب
أوشاعة تنفرد بأول حديث مع المدير الفني الجديد للمنتخب القومي للكرة الشراب
الكابتن ( حسن شيكورليه) أوشاعة: في البدايه مبروك عليك وعلينا يا كابتن. الكابتن : شكرا... أوشاعة: الجماهير عايزه تعرف إيه الخطة اللي هتلعب بيها؟ الكابتن: شوف إحنا جربنا خطط كتير مرة 3-5-2 ومرة 4-2-4 ومرة 4-4-2 كله
فشل أنا هلعب بقه بخطة 7-3 خطة كدة متخرش المية. أوشاعة: يا سلام..طيب فين معسكر الفريق للماتش الجاي وإمتى؟ الكابتن: ربك يسهلها غالبا قبل الماتش بشهرين تلاتة يعني علشان اللعيبة
تاخد على بعض وتدلع وهيكون بقه في فندق نضيف يا جدع.... أوشاعة: طيب حضرتك عملت لايحة للمكافأت والجزاءات؟
الكابتن: المكافأت مقدرش أقول عليها علشان العين وحشة أما الجزاءات فأنا
حلفت يمين طلاق إن اللي هيرجعلي بعد 3 الفجر أو سكران طينة ولا مش عامل حسابي
في العشا هبيته عند امه.. أوشاعة: إيه الحزم ده يا كابتن..طيب..إيه البرنامج اليومي في المعسكر؟ الكابتن: شوف يا باشا نقوم براحتنا احنا ناس متجوزه وبنسهر بقه يعني علي
12 الضهر نستحمى ونضرب الجيل ونعمل الإصطباحة ونفطر ..نتجمع علي 3 ..نتغدي
وبعدين كل واحد مع نفسه لغاية 6 اللي عايز يعاكس، ينام، يضربله سجاره.....تمام
معاية؟....بعد كدة نتجمع تاني 6:30..تليين عضلات لغاية 7 وبعدين شوية قرف بقة
كل لعيب يورح يوضب سريره جري وييجي..8 تقسيمة، نقسم فريقين ونلعب علي فلوس
لغاية 9 بعد كده...راحه.... أوشاعة: بنتمنالك يا كابتن التوفيق ....
الكابتن حسن شيكورليه في سطور السن: 55 من مواليد كفر مفتاح
لعب في فريق كفر مفتاح بدوري المحاريم ثم إنتقل لفريق كفر شتانوفي في دوري
المفاجيع ولعب فيه موسمين ثم إحترف في فريق أي سي مغاغة لمدة موسم واحد ورجع
لدوري المحابيط حتي اعتزل بالعافيه.
الخبرات:1- حاصل علي الحزام الاسود بعد ان مارس التحكيم سنتين.
2- حاصل علي شهاده ( انت مية مية ) من المعهد العالي للمدربيين.
3- حاصل علي شهاده ( ايه يا واد الحلاوه ديه) من كلية المدربيين الجامدين.
4- درب فرق كفر مفتاح، كفر درمالي، ريال زقازيق.
انجازاته: 1- حصل علي كأس الطوبه الذهبيه في دورة كفر مفتاح الصيفية.
2- حصل على لقب أجدع دماغ في دورة كفر مفتاح الليلية.
3- حصل علي لقب احسن واحد يقزقز لب في دورة كفر مفتاح الرمضانية.
4- حصل علي لقب أحلي دم خفيف في دورة كفر مفتاح الزراعية.
site by 
