ازيكو يا شباب
هاااي يا بنات إحنا بقه شوية شباب روشة ومطرقعين علي الآخر مرة كدة وإحنا قاعدين وآخر
روقان قعدنا نمخمخ ونعصر دماغتنا ونطلع خلاصة خبراتنا في الحياه وبقة كدة يعني
خالص...قوم إيه عملنا حاجة كدة سمناها أوشاعة..ولحد دلوقتي الواحد مش فاهم
الحاجه ديه مجلة ولا موقع ولا إيه بالظبط المهم أهي حاجة والسلام والمهم إنها
تعجبكوو ..لأ..مش مهم إنها تعجبكوو علشان هي أكيد هتعجبكوو وهتتجننوا عليها
وهتشدوا شعركو كل مرة هتقروها بس ياريت تشدوا شعركو من الإعجاب مش من حاجات
تانية المهم أكتر إنكو تشاركوا معانا ونسمع صوتكوو.. ونحس بنبضكوا علشان من
الأخر إحنا ممكن نكون مطرقعيين حبتين واوشاعنجية تلات حبات وبنمخمخ كتير ومع
نفسنا أوي بس شباب عادي عايش نفس الواقع اللي عايشين فيه وبيحس اللي انتوا
بتحسوه..إيه الكلام الكبير ده وبيطلع منين..بقولوكوا ايه ما تيجوا نعرفكو علي
نفسينا..
المطرقع ده إسم الشهرة والإسم الأول وكمان اللقب..والطرقعة ديه مش معناها الجنان
لاسمح الله ولا الهبل معاذالله ولا العبط لا قدر الله لأ الطرقعة ديه معناها
كبير كبير ..يعني أنا بتاع الأفكار والتكتيك والفتافيت وأحيانا القراقيش
والكتاكيت..سبع صنايع والبخت ضايع..إهتماماتي منحصرة في الأكل شوفوا مفيش مطعم
ولا عربية فول في بلدك إلا ودخلتها بس المشكلة إني مش دايما بخرج...إيه ده
إنتوا عايزين تعرفوا كل حاجه بسرعه..مش هينفع..تطرقعوا مني..
الأوشاعنجي
من غير كلام كتير أصلي مش بحب الرغي واللت والعجن، وبكره موووت الاوشاعات سبحان
الله أول ما بسمع حاجة أسد وداني ومش بنقل الكلام وتلاقيني لا بقرا مجلات فنيه
ولا جرايد رياضيه ولا مواقع نت ولا عايز أعرف مين إتجوز مين ولا مين بيحب مين
ولا أي حاجة ..مش كده أحسن برضه بس مش فاهم ليه بيقولوا علية اني مقطع السمكة
وديلها وبورم! شوفتوا الأوشاعات الي طالعة علية مع إن وشي بيضرب ألوان لما بكلم
بنت وعمري ما عرفت غير منى وليلى وهيام ورندا وبكينام وفتحيه وقطقوطة وتوتو
ولولو وكوكو وبس وكلهم زي اخواتي.. شوفتوا الأوشاعات محوطاني إزاي ...
مخمخ هاللللوووو...مخمخ شوفوا إسمي سهل ازاي يعني ميم وخه مضروب في إتنين ..كل
حاجه تبقى كويسة لو إتحسبت بالعقل والدماغ والمخيخ والجمجمة والمخ بس الترقعة
والعفرتة يبقي آخر زفلطة..آه..نسيت أقولوكو إني شاعر كبير ليه 18 ديوان
ونص..وأنا متوقعلي مستقبل باهر في الأوذاعة والتليفزيون والبوتاجاز..مشكلتي إني
رومانسي بدور دايما علي نصي التاني نفسي الاقي مخمخاية كده ونخلف مخاميخ
صغيرين...
الرايق
سلامووو عليكووو..معلش يا رجالة أصلي لسة صاحي من النوم تخيلوا منمتش غير 27
ساعه بس مع إن نومي الطبيعي 32 ساعة بس معلش صحيت علشان أشوفكوا ..أنا بقة
مبحبش غير حاجتين في حياتي أولاَ أكون مع نفسي وثانيا مع نفسي أكون بس موتي
وسمي صرف الفلوس...عايز تخسرني فكر إني أعزمك ..العيال صحابي دول واجعين دماغي
خالص مش قادرين يفهموني ومدخلني بالعافية علشان بعرف أرسم بس لما لقيت إني هكون
معاكو وأقابل بنات أمامير..وطبعا ولاد زي العسل قلت يالله..طيب عايزين حاجة
ياريت آخر واحد يمشي يطفي النور ويغطيني..
ولسة في ناس هتنضم لينا بس السكة واقفة والدنيا زحمة لما ييجو هيعرفوكو على
نفسهم
site by 
