الفنكوش: الأستاذ أدهم إحنا سعداء وقراء أوشاعة أكثر سعادة بيك.
أدهم: والله أنا أكتر.
الفنكوش: نحب نعرف من إمتي حضرتك بدأت مغامراتك؟؟
أدهم: والله طول عمري أموت في المغامرت وأول مره وأنا عندي 5 أيام عملت حركة التفافية علشان أرضع فوالدي الله يرحمه لما شاف كده وداني عند واحد صيني كان عايش في بلدنا اسمه حمدي هونج كونج علمني من أول الكاراتيه لحد المصارعه الروماني.
الفنكوش: ما أصعب موقف مريت بيه؟؟
أدهم: والله أنا حياتي منيلة بستين نيلة بس أصعب موقف أيام مغامراتي مع المافيا طبعا فاكرين الموزز بتعهم ..مره دخل علية قول عشر رجاله الواحد لو سند علي الهرم يوقعه وكل واحد اللي معاه آلي واللي أربيجيه واللي راكب دبابة واللي شايل علي كتفه صاروخ كروز والعبد لله معاه قصافه بس قلت يللا مبدهاش خبطة هنا وخبطة هنا في ظرف نص ساعة كومتهملك أصل محسوبك بطل جامد أوي.
الفنكوش: يا سلام إيه المهارة ديه طيب كام لغة حضرتك بتتكلمها؟؟
أدهم : والله أنا مبعدش أصلي بخاف من الحسد ..بس أعرف عربي وإسكندراني ودمياطي وصعيدي واللغه الأصل فلاحي.
الفنكوش: هل صحيح حضرتك بتسوق طيارات؟؟
أدهم: أكيد من أول الأبوح لغايه البوينج أصل الموضوع سهل خالص أول ما تركب تحط في ودنك سماعه ووكمان وبعدين هتلاقي جادون زي جادون العجله وعصاية الأدون يحركها يمين وشمال والعصاية فوق وتحت ولما تحب توقفها تنزل رجليك علي الارض.
الفنكوش: علي كده حضرتك تعرف تستخدم براشوت؟
أدهم: يعني أسوق طياره ومعرفش أسوق براشوت دا أنا لسه مأجر واحد كنت بزف فيه واحد صاحبي كان لونه أخضر بس الشكمان بهدلي البنطلون.
 

نستكمل العدد القادم